ئه‌سلێ یه‌كه‌ی كفری

له‌ساڵی هه‌شتاكاندا ره‌حمه‌تی نوری قازقاو و ئه‌سڵی كه‌چه‌ڵ بۆ گه‌شت كردن ده‌رۆن بۆ سلێمانی.. وه‌رزی زستان ئه‌بێ, نابراوان هه‌ردووكیان دوو كه‌سى مه‌ی خۆرن, وا ده‌زانن ته‌نها له‌سه‌رچنار نادی هه‌یه‌ و مه‌ی ئه‌خورێته‌وه‌, بۆیه‌ به‌و زستانه‌ ده‌رۆن بۆ هاوینه‌ هه‌واری سه‌رچنار له‌سلێمانی تا بتوانن مه‌ی ده‌خۆنه‌وه‌.. ئێواره‌یه‌كی دره‌نگ نوری به‌ئه‌سڵی ئه‌ڵێ: ئه‌سڵی دره‌نگه‌ بابرۆینه‌وه‌ بۆ هوتێل دوای جێگه‌مان بۆ نامێنێ..
ئه‌سڵی به‌رده‌وام ده‌بێ له‌خواردنه‌وه‌ تا وای لێ دێ توانای رێكردن و هه‌ڵسانی نامێنێ.. با ئه‌وه‌شمان له‌بیر نه‌چێ نوری چاكه‌ت و پانتۆڵێكی شڕی چڵكنی له‌به‌ردا ئه‌بێ و تووكی ریش و سه‌ری درێژ و چڵكن ئه‌بێ, ئه‌سڵی هه‌موومان ده‌یناسین, كابرایه‌كی بچوكی قه‌زه‌مه‌ و ده‌موچاوی چه‌وته‌ و هه‌ر چاوێكی رووی له‌لایه‌ك كردووه‌, چاوی راستیشى كوێره‌و سه‌ری كه‌چه‌ڵه‌, چاكه‌تێكی گه‌وره‌ی له‌به‌ردا ئه‌بێ لاشه‌ی ئه‌سڵی وه‌ك لاله‌نگی چۆن له‌ناو توێكڵه‌كه‌یدا ده‌سوڕێته‌وه‌ ئه‌سڵیش به‌و شێوه‌یه‌ بووه‌.. ئه‌وه‌نده‌ كه‌وتبوو و هه‌ڵسابووه‌وه‌ هه‌موو گیانی قوڕاوی ببوو..
نوری به‌رده‌وام راستی ئه‌كرده‌وه‌ و ئه‌سڵًی ده‌كه‌وت دواجار نوری هیلاك ده‌بێ و به‌دیار ئه‌سڵییه‌وه‌ دا ده‌نیشێ و جارجار پێی ئه‌ڵێ: ئه‌سڵی, ئه‌سڵی هه‌سته‌ دره‌نگه‌ بابرۆین.. له‌وكاته‌دا نوری بانگی ئه‌سڵی ده‌كات, چه‌ند كه‌سێك خه‌ڵكی سلێمانی ده‌بن به‌لایاندا تێده‌په‌ڕن و پاشان ده‌وه‌ستن ته‌ماشایان ده‌كه‌ن.. نوری به‌رده‌وام ده‌ڵێ: ئه‌سڵی هه‌سته‌ دره‌نگه‌ بابرۆین.. یه‌كێك له‌كابراكان به‌نوری ده‌ڵێ: ئێوه‌ خه‌ڵكی كوێن؟
نوری ده‌ڵێ: خه‌ڵكی كفرین.
كابرا ده‌ڵێ: هاورێكه‌ت ناو چیه‌؟
نوری ده‌ڵێ: ناوی ئه‌سڵی یه‌.
كابرا ده‌ڵێ: خه‌ڵكی كفری ئه‌مه‌ ئه‌سڵییه‌كه‌یه‌تی خوا ده‌زانێ عادیه‌كه‌ی چۆن بێ؟