له‌ گه‌رمیانه‌وه‌ بۆ هه‌موو جیهان

 

زه‌نگ كورد

zengkurd.net

 

 

زه‌نگێك بۆ هۆشیارى هاووڵاتى.. زه‌نگێك بۆ بێدارى ده‌سه‌ڵات

 

كوده‌تاچییه‌كانى (22) ى ته‌مموزو.. خیانه‌تى برایه‌تى و درۆى هاوپه‌یمانى

فاتیح سه‌لام



ئه‌و وته‌ زێرینه‌ى كه‌ده‌ڵێت كورد ته‌نها چیاكان دۆست و پاڵپشتییه‌تى له‌خۆرا و به‌بێ مه‌به‌ست نه‌وتراوه‌، ئه‌گه‌ر ئه‌زمونێكى تاڵ و وانه‌یه‌كى لێوان لێو له‌راستى و په‌نجه‌گه‌زینى له‌پشته‌وه‌ نه‌بووبێت. وه‌ستانى ئێستاى به‌غدا له‌سه‌ر قاچى سیاسه‌تى خۆى وئه‌و ره‌وشه‌ نیوچه‌ ئارام وسه‌قامگیره‌ ،راسته‌ عه‌ره‌ب به‌شى هه‌ره‌ زۆرى قوربانییه‌كانى ده‌ستى ئه‌و تیرۆرو قوربانیانه‌ بووه‌ ،وه‌لێ كورد فاكته‌رێكى سه‌ره‌كى ورۆڵێكى گرنگ وئه‌كتیڤى هه‌بووه‌ له‌خولقاندنى ئه‌و هێمنى وخاوكردنه‌وه‌ى گرژى ووه‌ستانى خوێن رشتن وتوندو تیژییه‌كان.اه‌گه‌رمه‌ى ئه‌و هه‌ڵپاچین وداپاچینه‌ى شه‌رى سوننه‌و شیعه‌ى عه‌ره‌با ،كه‌له‌سه‌رده‌مى حوكمى جه‌عفه‌ریدا خوێنى گه‌یانده‌ ئه‌ژنۆ ،سه‌رانى كورد له‌به‌غا له‌پێش هه‌موویانه‌وه‌ مام جه‌لال كه‌وتن هه‌وڵ وته‌قه‌لاى هێور كردنه‌وه‌ى ئه‌و دۆخه‌ خوێناوى وناهه‌مواره‌و توانیان كاریگه‌رییه‌كى باشیان هه‌بێت له‌سه‌ر ئه‌و لایه‌نانه‌ى مه‌رگیان له‌كون وقوژبنى هه‌موو شوێنێكى شاره‌كانى ناوه‌راستى عێراقدا چاندبوو .له‌دانیشتنێكداو به‌دێرێك جه‌عفه‌رى سه‌ره‌ك وه‌زیران به‌مام جه‌لالى ووتبوو :دڵسۆزى وبرایه‌تى وپه‌رۆشى خۆتان بۆ گه‌لى عێراق ویه‌ك پارچه‌یى خاكه‌كه‌ى سه‌لماند وبه‌و ئومێده‌ى بتوانین له‌ئاست ئه‌و دڵسۆزى وخه‌مخۆریه‌تاندا بین وئه‌مه‌ وون نه‌كه‌ین ..!!.پاداشتى ئه‌و له‌به‌ختانه‌ى كورد به‌كۆبوونه‌وه‌ى نهێنى چه‌ند شه‌وه‌و ده‌نگدانى نهێنى و جاسووسیانه‌ى كوده‌تا ئامێزى سه‌ر مادده‌ ده‌ستوورییه‌كه‌ى (140) وگۆڕه‌و شاركردنى خواستى كوردان له‌كێشه‌ى ره‌واى كه‌ركوكیدا ئه‌وه‌ دیارییه‌كه‌ى بوو كه‌بینیمان وله‌وه‌ش خراپتریشى لێ چاوه‌روان ده‌كرێت .به‌درێژایى مێژوو كورد باجى دڵسافى ونێت پاكى وپشت كردنه‌وه‌ى له‌درۆى برایه‌تى وپێكه‌وه‌ ژیانى شۆرشه‌كانى داوه‌ته‌وه‌و،لایه‌نى براى ده‌ست له‌ملیش جڕتى بۆ كێشاوه‌و گونى حوشترى پیشان داوین وله‌هه‌لێك گه‌ڕاوه‌ نوكى خونجه‌رى ژه‌هر گرتووى تاسه‌ر ئێسك بهاوێ .مێژووش له‌توێ ى لاپه‌ره‌خوێناوییه‌كانیدا زۆر نموونه‌ى ئه‌فسووناوى وخه‌مناكى له‌م جۆره‌ى تێدایه‌ .مه‌شهه‌دانى له‌ناو جه‌رگه‌ى هه‌ولێرى پایته‌ختا دواین شێوازى ڤیلاى ده‌درێتێ وچه‌ندین ئاسایش پارێزگارى خانه‌واده‌كه‌ى ده‌كات ،هاشمى له‌دۆكان هه‌مان شت وره‌غده‌و ساجیده‌ش كاتى خۆى قاییل بوونایه‌ ئێستا ئه‌وانیش له‌و شوێنه‌ى خۆیان خوازیارى بوون موعه‌ززه‌زو موكه‌ڕه‌م بوون .داخۆ چه‌ند نموونه‌ى دیكه‌ له‌م جۆرانه‌ برا دوژمنانه‌ له‌كوردستاندا خانوو وموڵك وده‌یان دۆنم زه‌وى كشت وكاڵیان بۆ تاپۆ كرابێت وخه‌ڵك پێ ى نه‌زانێت وبانه‌ رۆژ ئاشكرابن .ئه‌وه‌ ئێمه‌ین واژۆى خنكاندنى سه‌دام ره‌تده‌كه‌ینه‌وه‌و ،داواى ئازادكردنى سوڵتان هاشمى شاسوارى هه‌شت پرۆسه‌ى ئه‌نفالى كورد ده‌كه‌ین ، له‌سه‌نگه‌سه‌را كۆشك بۆ شا عه‌بدولڵاى ئه‌رده‌ن دروست ده‌كه‌ین ،هه‌رچى چه‌قاڵو به‌قاڵى بازارى سیاسه‌تى قسه‌ى ته‌ڕو كۆنه‌ داخ له‌دڵ وشۆڤێنى وبۆده‌ڵه‌ هه‌یه‌ ،هه‌رهێنده‌ به‌درۆ ناوى هێناین یان بابه‌تێكى به‌رژه‌وه‌ندخوازى تایبه‌تى له‌سه‌ر نووسین بانگهێشتى ده‌كه‌ین وله‌نابابترین ئوتێلى هه‌ولێرو سلێمانى وهاوینه‌ هه‌واره‌كانماندا ده‌رگا هه‌موو شتێكیان بۆ ده‌خه‌ینه‌ سه‌ر پشت
.ئه‌ى ئێستا پاش ئه‌و هه‌موو به‌د نمه‌كى وخیانه‌ت وفێڵ وده‌ست برین وساخته‌ كاریانه‌ى به‌نوێژى نیوه‌ڕۆ بێ شه‌رمانه‌ ده‌رهه‌قمانى ده‌كه‌ن وده‌ستوورێك ئێمه‌ بۆى بووینه‌ به‌په‌رژین وئه‌وان به‌ناده‌ستوورى ده‌زانن وبه‌ویستى خۆیان كه‌م وزیادى ده‌كه‌ن كاتى نه‌هاتووه‌ به‌هاوپه‌یمانێتى ورێكه‌وتن وله‌سه‌ر هه‌ڵوێسته‌ كردنى كوده‌تا ى كوده‌تا چییه‌كانى (22)ى ته‌مموزدا بچینه‌وه‌ .ئه‌ى ئیتر قه‌وانه‌ سواوه‌كه‌ى یه‌كپارچه‌یى خاكى عێراق ورێزگرتنى ده‌ستوور شایانى ئه‌وه‌ نى یه‌ بكه‌وینه‌ حیساباتى خۆمانه‌وه‌و،له‌كرۆكى دۆزه‌ ره‌واكه‌ماندا كه‌كه‌ركوكه‌ وده‌یانه‌وێت ره‌وانه‌ى عه‌رعه‌رو نوگره‌ سه‌لمانى بكه‌نه‌وه‌ تێفكرین .ئه‌ى ته‌قه‌كردن له‌خه‌ڵكى خێر له‌خاكى خۆ نه‌دیوى كه‌ركوكییه‌كان وره‌وانه‌ كردنى هێز له‌ناوه‌رارست وخوارووى عێراقه‌وه‌ بۆ ئه‌م شاره‌و داواى چۆڵكرنى سه‌عدییه‌و جه‌له‌ولاو خانه‌قین وحه‌وزه‌ى حه‌مرین وقه‌ره‌ته‌په‌و تبچ وعومرمه‌ندان له‌هێزى پێشمه‌رگه‌و لیواى فه‌رمى هێزى سوپاى گه‌رمیان كه‌به‌خوێنى ده‌یان رۆڵه‌ى خوێ گه‌رمى ئه‌م میلله‌ته‌ له‌ده‌ستى تیرۆریستان رزگاركراون نزیكه‌ى ساڵێكه‌ خوێنى تێدا ده‌رژێت به‌چ هه‌قێك هه‌ره‌شه‌ى ئۆپه‌راسیۆنى سوپاى عێراقى ده‌كرێته‌ سه‌رو داواى كشاننه‌وه‌ى لێ ده‌كرێت .پێوویسته‌ كورد ژیرانه‌تر تاوتوێى ئاینده‌ى سیاسى خۆى بكات له‌ هاوكێشه‌ ئاڵۆزه‌كانى ئه‌مرۆدا ئه‌گینا ئه‌وه‌ش چه‌ندین ساڵه‌ پێكه‌وه‌ى ده‌نێین وناومان ناوه‌ به‌شه‌ ئارام وسه‌قامگیره‌كه‌ى باشوورى كوردستان ده‌یخه‌نه‌ به‌رده‌م ئه‌و بایه‌ى مه‌گه‌ر هه‌ر مه‌شهه‌دانى به‌ده‌ستوورو ماده‌ى (140) ى كردبێت.

په‌یوه‌ندى:        zeng_rojane@yahoo.com         zengkurd@yahoo.com